Buscando información sobre la sociedad del siglo XIII y su composición religiosa y cultural, encontré este artículo escrito en judeo-español. Trata sobre el alcance de la convivencia en laToledo de la época medieval entre judíos, cristianos y musulmanes.¡Qué sorpresa la facilidad con la que se entiende esta lengua! ¿Os animáis a leerlo?Si os gusta, como a mí, consultad en el enlace de la revista donde se ha publicado, Akí Yerushalyaim, encontraréis cosas muy interesantes.

Mª Paz Beneitez 

EXISTIO UN "TOLEDO DE LAS TRES KULTURAS"?

Entre los musulmanes de Al-Andalus o entre los kristianos de los reynos rekonkistados, los sefaradis siempre konstituyeron una minoria ke dependia de la proteksion real i de la konyunktura sosio-ekonomika: en momentos de kriza fueron los ke mas sufrieron. La suvida de algunos djudios a las altas sferas de la administrasion i de la korte fue siempre izolada i osilante. Es tipiko el kavzo de Samuel ha-Levi, el djudio mejor situado de su tiempo, mesena de la sinagoga del Transito, konsejero i trezorero del rey de Castilla Pedro I, asta ke fue matado por orden del mizmo rey, a kavza de dezavenensias finansiaerias.

Kon kriza o sin eya, la kultura sefardi nunka pudo dezveloparse yenamente, porke la manifestasion de una kultura minoritaria depende de unas kondisiones sosiales de akseptasion de la diferensia, lo ke no existia en la Edad Media. Los sefaradis fueron kapaches, esto si, de dezvelopar nukleos kon un funksionamiento partikular, adientro de las juderias, ma esto era limitado por las kondisiones eksteriores.

La publisidad avla oy del "Toledo de las tres kulturas", kuando la djudia nunka pudo manifestarse de manera avierta ni kompletamente. No konvivieron kulturas, siempre uvo una dominante (la musulmana o la kristiana) ke dava a las otras solamente chikas oportunidades para ekspresarse.

Ma esto fue aze muncho tiempo, i el renkor no es bueno. Si miramos bien podremos ver ke Toledo supo mantener i aprovechar su erensia multirelijioza de forma admirable. La trasa kristiana, naturalmente, siendo ke fue la relijion vensedora, ma la musulmana i la djudia tambien fueron rekuperadas i pulidas konvenientemente.

De esta ultima, la trasa djudia, ay tantos detalyos atraktivos ke konsiderar a Toledo la kapital sefaradi no es, en este kavzo, ninguna simplifikasion: Las kayes i las puertas, las ventanas i las reshas, los banyos, las sinagogas, todo en la djuderia de Toledo, mizmo si konserva pokos elemen-tos orijinales, evoka akeyos tiempos en los kualos los sefaradis bivian, lavoravan, diskutian i kreavan en esta sivdad. No es difisil pedrerse en alguna de estas kalejikas i sentir el esprito de tiempos pasados, la majia de akel espasio mitiko del kual salieron las famiyas djudias en 1492, kon la esperansa de tornar algun dia a lo ke konsideravan sus ogar.

Oscar Monterreal

*Istoriador, profesor de Siensias Sosiales en Essuni (Universidad Complutense de Madrid).